De letste echte werm daag ligge achter os. Langzaam aa mak de natuur zich op vuur kuuning Winter. En vïeër maake os op vuur ‘t nuuje vasteloavessezoen. Hinger de sjerme zunt de vuurbereidinge in vólle gang. De Kaatboere (6×11 joar) en de Kaatbuurkes (54e sezoen) kieke d’r al noa oeët um saame mit uch de duldwaaze daag durch te bringe.

Dees kieër in ’t thema mit d’r toepasselikke naam:

“6×11 joar de kaate gesjud!”

In dit vuur CV De Kaatboere jubileumsezoen zulle gans get zaake oet de aafgeloope joare de revuu pas- seere. Vieër hoape, dat ‘t ‘n sjpétterend sjpektakel geet weëde!
Mer vuurdat vieër os in de historie van de Kaatboere sjtorte, oapene vieër ‘t sezoen mit ’n mis en doa- noa an d’r kaatdusj, onger ‘t motto:

“Hartejaage biej ’t Mia!”

Zoaterdig 16 november aanstj. ieësj um 19.00 oeër ‘n mis in ‘t Kunderhoes. Vuur d’r muzikaale inbreng zurgt ’t koër Neet Mis oet Eekenderveld o.l.v. Rob Dijcks. Ooch is d’r nog inne gastsjpreëker, en neet d’r minste! Ger Prickaerts is d’r groeëte maan hinger ’t Heëlesj woadbook en professor biej de narrenuniversiteit NUL.

Um 20.33 oeër oapene de poate van “ ’t Kaatehoes Kunderkruuts” an d’r Heëleweëg in Kunder. Dj Danny bringt in dees “Herzilein”-echtige lokaasie de gaste in de goei sfeer.
Oeteraard och dit joar ging lestige kleijervuursjrifte. Vieër vinge ‘t vuural sjiek es dieër d’r allemoal biej zeet. Mer ékstra leuk vinge vieër ‘t es de “Oase Kunderkruuts” zich vult mit hieël veuël kaat- simboole, landkaate, of wat uch och moage ivalle. Uch kreativitiet kinnende, zal dat vast wer ee geweldig rezultaat oplieëvere ! Gunt vieër dur saame weer inne hilarisch gezellige oavend van maake? Dan meld uch rap aan!

Sjik uuterlik moandig 4 november de aanmelding noa kaawokaa@gmail.com of deponeer ’n sjriftelikke aamelding in de breevebus van Kundergats 18.
Vermeld in beide gevalle naam, aantal persoeëne, (e-meel-)adres en telefoonnummer.  In verband mit de koste vroage vieër uch ‘n kling eige biejdraage va € 5,– p.p.

Op zoaterdig 16 november is d’r, alling vuur noeëd-gevalle, ooch nog ’n dag-entreekassa biej de fieës-lokaassie. Vieër kieke oet noa uch kompst en zulle uch hartelik verwelkoome.

Nieks sjunder wie Kunder!