Kiek hieonger vuur d’r teruukblik durch Levi I

♥️ Wie hubste gehoëd dats dich prins moags weëde?
Op inne oavend in December, mien zus woar al aan ut sloape, makte mien ouwesj mich wakker. Op de bank heurde ich toen dat miene groëte dreum um prins te weade bie de Kaatbuurkes oetkoam. Ich kos ’t iesj echt neet geleuve. Vier hubbe geproost mit cola en chips om alvas in de stumming te koame. Ee paar daag later koame Leo, Dimitri en Layla ’s oaves op bezeuk en vertelde mich alles wat ich woal weete.

♣️ Wat vongst dich t sjunste van dien regeringsjoar?
Ich hub mich zoë verheugd op d’r daag va de Proclamatie. D’r ganse daag fiëste mit mieng Kaatbuurkesvrung en dan eindelik oet die gokkas springe met Ize. D’r optoch kint oach neet ontbreake in dit rieke. Al die luuij langs d’r weag, snoep gooie tot ich d’r bie neervool en springe op ozze geweldige waage. Mit inge prachtige regenboag op ’t eind. Op ’t eind van d’r oavend fiëste, nog op de sjouwers gepak weëde en nog ee letste leedje in d’r krink tussen alle Kaatboere, familie en vrung. Dat woar oach vet!

♦️ Wat zulste noëts vergeëte va dien regeringsjoar?
Elk moment woar sjiek mer d’r zunt ee paar momenten die ich noëts gun vergeate. De afterparty bie mich toes; same mit Ize noageneete en polonaise lope durch de ganze hut. En dat fiëske is ging afterparty zonger ut snorretje van ’t Layla. Ing paar weëke geleije zunt vier mit de Kaatbuurkes begos mit de jeugdproclamatie in Ubachsberg. Doanao sjnel eate en durch noa de Proclamatie va de Kaatboere. Dat woar inne sjieke oavond, de tent woëd aafgebroake inclusief de gitaar van Rempetemp! Aafsleete mit frikadelle bie de mam va d’r Gregor. 14 oer achteree fiëste, dat vong ich waal get.

♠️ Wat wilste es letste nog zigge?
Ich kin neet angesj zigge dan bedank aa iederein dea mit mich mit gedanst en gefiëst had. Ich bin trots dat ich bie dees vereniging zit die euveraal liët zeen wie se een fiëske mos viere. Ich wooj nie goan mer wil oach éch dat miene opvolger veult wie sjiek dat dit is. Nieks sjunder wie Kunder!

Levi, namens de ganse Kaatboerefamilie; Bedank veur alles aafgeloape seizoen!