Kiek hieonger vuur d’r teruukblik durch Siem I

Leef luuj va Kunder en weide omsjtreeke,

Wat woar ut sjiek om jeugdprins te zeen mit mien leeve prinses Liv I van c.v. de Kaatbuurkes in ut aafgeloape karnevalsseizoen. Ut begos allenuj wie pap mich koam vertelle dat Leo Cremer hei gevroagd of ich prins wool weare van de Kaatbuurkes. Ich hei doa nog neet uuëver noagedacht, omdat ich dach dat dat neet kos, omdat v’r aan ut verboewe woare thoes, dus ut koam een bietje es een verrassing. Mien antwoord woar natuurlijk een volmondig Joa! Ut lange wachte en zjwiege kos beginne.. De prinsesjteek woeëd zelfs op d’r 2e Krisdaag in Maasmechele oetgezoch. De sjpanning vuuraaf en de kennis dat ich een groeët geheim mit mich mit droog wat ich echt ginne mog vertelle, woar onvergeatelik!
De poclamatie van mich en Liv waor inne knaller van jewelste, mit een geweldige afterparty bie d’r Lars in de Pintelier. Vier danste en sjpronge op de toafels mit eekerinne dea doa woar! Ut hoeëgtepunt van mien regeringsjoar woar natuurlik d’r sjunne groeëte optocht durch Kunder en Voelender in ut sjtroalende zunneke. Klumkes werpe en gezellig danse en sjpringe mit de jeugdroad op ozze sjunne prinsewage, wat een feest! En fieëste koste vier es de beste mit de Kaatbuurkes. Op alle fieëskes sjtonge vier es letste op d’r dansvloer en goove de angere vereniginge dan oach ummer ut noakieke. Ich wil mien familie, jeugdprinses Liv en heur familie, alle leden van de road, de Oad Jeugdprinsen en prinsessen, ut Kaatbuurkes Komitee en prins Gregor dan oach hieél erg bedanke vuur ut fantastische joar dat v’r samen hubbe gehad. Ich zal ut nooit vergeate en ich bin d’r trots op dat ich noe officieel inne Kaatboer bin!
Verder wil ich ut nuuje prinsepaar eave veul sjpas en plezeer (op de Kundesje meneer) wunsje es dat ich hub gehad ut aafgeloape joar. Maak d’r inne geweldige tied van en geneet van elk moment, want vuur se ut wits, is ut wir vuurbie!
3 x kreftig alaaf en d’r is nieks sjunder, es prins te zeen in Kunder!

Prins Siem I (2025)
j.c.v. de Kaatbuurkes

Siem, namens de ganse Kaatboerefamilie; Bedankt vuur alles aafgeloape seizoen!